„Ljepotica i zvijer“ u KIC-u

Predstava „Ljepotica i zvijer“ (4+), za koju režiju potpisuje Teatar mladih prema tekstu Igora Bojovića, biće izvedena u petak 11.oktobra, u 12 sati, u Velikoj sali KIC-a „Budo Tomović“. Komad sa Dramske scene za djecu Gradskog pozorišta, ovog puta gledaće đaci iz osnovnih škola „Štampar Makarije“, „Oktoih“ i „Savo Pejanović“.

„Ljepotica i zvijer“ rađena je u kombinaciji maske, glumačke igre i sjenki. Na duhovit način predstava pripovijeda poznatu bajku o ljubavi koja se rađa između Najljepše Međ’ Najljepšima i Zvijerske Zvijeri. Kako je Zvijer zapravo razmaženi princ na kojeg je bačena kletva, to stvara niz komičnih situacija u kojima učestvuje i dvorska luda Skakutalo…

Igraju: Marija Labudović, Vule Marković i Branko Ilić.

Scenografija, kostim i maske djelo su Ivanke Vane Prelević, muziku potpisuje Olivera Dakić, koreografiju Slavka Nelević, a sjenke Velimir Velev.